Аляксандр Аляксандравіч Марчанка быў заключаны пад варту паводле ч. 3 арт. 361-1 Крымінальнага кодэкса па абвінавачванні ва "ўдзеле ў экстрэмісцкім фармаванні". Ён быў затрыманы супрацоўнікамі міліцыі 19 кастрычніка 2023 года. Пасля арышту ён адбываў два адміністрацыйныя арышты па 15 сутак кожны. Праваабаронцам вядома, што другі з іх быў прызначаны 3 лістапада судом Цэнтральнага раёна Мінска. Тады суддзя Юльяна Шчэрба прызнала 63-гадовага Марчанку вінаватым у "распаўсюдзе экстрэмісцкіх матэрыялаў" (паводле ч. 2 арт. 19.11 КаАП).

Судзіць Аляксандра пачалі 25 сакавіка 2024 года ў Мінскім гарадскім судзе (суддзя Святлана Макарэвіч). У выніку Аляксандр быў асуджаны да трох гадоў пазбаўлення волі ва ўмовах агульнага рэжыму. Да апеляцыі ўтрымліваўся ў турме № 4.

4 чэрвеня 2024 г. адбыўся разгляд апеляцыйнай скаргі Аляксандра. Старшыня судовай калегіі Вярхоўнага суда — Аляксей Хлышчанкоў. Скаргу пакінулі без задавальнення.

Адбываць тэрмін Аляксандра накіравалі ў магілёўскую турму № 15.

28 чэрвеня 2024 года быў унесены ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.