Кацярына Мікалаеўна Новікава спачатку была затрымана паводле двух артыкулаў Крымінальнага кодэксу: ч. 3 арт. 203-1 КК (незаконныя дзеянні ў дачыненні да інфармацыі пра прыватнае жыццё і персанальных даных) і арт. 130 КК (распальванне сацыяльнай варожасці).

11 студзеня 2024 года ў Мінскім гарадскім судзе пачаўся разгляд справы Кацярыны. Суддзя — Алена Шылько.

Утрымліваецца ў СІЗА № 1. 

Вядома, што Кацярыну затрымалі напачатку лета ў адной начнушцы, у якой яна знаходзілася ў СІЗА да першай перадачы ад родных. Дома яе чакаюць каты і маці. Кацярына любіць кветкі, зефір і зялёную гарбату.

Жанчыну вінавацілі адразу паводле сямі крымінальных артыкулаў: арт. 198 (перашкода законнай прафесійнай дзейнасці журналіста), арт. 130 (распальванне іншай сацыяльнай варожасці), арт. 203-1 (незаконныя дзеянні з персанальнымі дадзенымі), арт. 364 (гвалт альбо пагроза прымянення гвалту ў дачыненні да супрацоўнікаў органаў унутраных спраў), арт. 365 (умяшальніцтва ў дзейнасць супрацоўніка органаў унутраных спраў), арт. 366 (гвалт або пагроза ў дачыненні да службовай асобы) і арт. 389 (стварэнне ўмоваў для здзяйснення пагрозы ў дачыненні да суддзі).

Артыкул 203-1 у выніку перакваліфікавалі на арт. 179 ч. 1 (незаконны збор ці распаўсюд іфнармацыі пра прыватнае жыццё). 

У пачатку красавіка 2024 г. крыніцы "Белсату" перадалі рэдакцыі ліст ад Кацярыны. На кавалку туалетнай паперы Кацярына апісала сваё жудаснае затрыманне і далейшае зняволенне:

"Я ўпала з другога паверха ложка, галавой аб драўляную лаўку. Здымак зрабілі, але больш за месяц не паведамляюць вынік".

"Ставілі на сцяг, білі ўсім кабінетам. Сказалі, што за мае інтэрв'ю, канал і за мае палымяныя звароты. У маёй першай адвакаткі, падобна, сын працуе ў ГУБАЗіК (але гэта не дакладна)".

"Маімі пацярпелымі з'яўляюцца тыя, ад каго я пацярпела ў 2020-м. Два апошнія адвакаты ў мяне ніякія. Бесяць".

"Вельмі шмат палітычных тут, але многія з іх выпадкова палітычныя і "стучаць" адзін на аднаго. Мама агаварыла мяне следаку, я ў шоку была".

Кацярыну абвінавацілі паводле сямі артыкулаў Крымінальнага кодэксу, у выніку прысудзілі 6,5 гадоў зняволення і 3000 беларускіх рублёў, якія яна мае выплаціць у якасці кампенсацыі "пацярпелым".

Ад 2 красавіка 2024 г. утрымліваецца ў СІЗА № 3. 

16 ліпеня 2024 г. адбыўся разгляд апеляцыйнай скаргі. Старшыня судовай калегіі Ігар Любавіцкі. 

Адбывае пакаранне ў ПК № 4. 

2 жніўня 2024 года была ўнесена ў пералік грамадзян Беларусі, замежных грамадзян і асоб без грамадзянства, якія маюць дачыненне да экстрэмісцкай дзейнасці.

У жніўні 2024 г. унесена КДБ у "спіс тэрарыстаў".